Valentina Todanes e Isaac Díaz Pardo

Nu inspirado na obra de Isaac Díaz Pardo (autora: Valentina Todanes)

Entrega tres pezas con dúas liñas temáticas diferentes a artista Valentina Todanes, escultora en madeira e artesá. Comenta que hai moitos anos coincidiu con Isaac Díaz Pardo no Auditorio de Compostela, "achegouse a min e preguntoume se me coñecía, e díxenlle "agora si. Rimos os dous, sorprendeume polo pequeno tamaño físico e pola grandeza que emanaba (...)".

Tamén recorda que coñeceu a "Pepe Neira Vilas, onde a nosa relación íntima frutificou nunha amizade grande e especial coma a arte".

Xa mergullándonos nas pezas que entrega, cómpre sinalar que dúas delas son pratos de madeira (coma os do polbo) que levan polo bordo do bico unha decoración elaborada en pirogravado e con deseños de Isaac Díaz Pardo. Nun deles vense as combinacións xeométricas de triángulos e trapecios tan singulares na cerámica de Sargadelos, no mobiliario das instalacións que xermolaron do Laboratorio de Formas etc. Pois  algunhas mesas e cadeiras empregaron tales deseños para decorar non só as coñecidas galerías senón, incluso, a cafetaría do Instituto Galego de Información.

Pratos pirogravados (autora: Valentina Todanes)

O outro dos pratos conta cunha greca prirogravada que se confecciona a partir dunha restra de cunchas de vieira. Consegue a autora con ambas pezas non só unha vinculación coa cerámica deseñada por Isaac senón, ademais, unha proximidade da persoa espectadora coa tradición, coas romarías e coa utilidade cotiá de tales deseños.

A última das obras é a talla en baixorrelevo dunha figura feminina núa. O espido non hai dúbida que se inspira naquela serie "20 Desnudos de Cecilia la Acróbata", realizada por Isaac e publicada dende a Imprenta Moret no ano 1965. Velaquí unha fermosa versión para a homenaxe, para a arte e, como non, para a lembranza.

Nu (peza realizada por Valentina Todanes)

Beizóns, Valentina; saúde e moita arte...

Comentarios

Publicar un comentario

Publicacións populares deste blog

Loli Suárez e un café con Isaac

Imaxe
Loli Suárez realizou esta instalación para lembrar as tonalidades da cerámica de Sargadelos, ese tons caligráficos da nosa epiderme cultural, sensíbel e con recendo a memoria que non esquece. Certo é que nela aparecen pezas desa fábrica, outrora rexida con ímpeto (pero sobre todo con xenerosidade) por Isaac Díaz Pardo. Porque esas alfaias azuis e brancas (abandeiradas no celeste) combinan moi ben co verde da Terra (da Nosa Terra!) dende a que se respira aínda hoxe a ánima imperecedoira daquel que veu ao mundo na Casa da Tumbona. Canda esta peza, un correo da súa autora advirte do seguinte: " Boa tarde! Achégovos a miña pequena homenaxe a Isaac Díaz Pardo. A foto é unha síntese do que el representa na miña vida e, sobre todo, dende que empecei a ler sobre el e Luís Seoane. Agradezo moito, moito esta inciativa. Unha aperta ben forte (...). María Dolores Suárez Baltasar ". Sinceramente, dende o Alento Esbravexo gustamos de instalacións tan xeitosas e acaídas como a que aquí se e
Ler máis

Por ti, Isaac, volveriámolo facer!

Imaxe
Poñerse diante do teclado do ordenador para escribir algo que non queriamos facer, xusto hoxe, íase demorando instante tras instante, co morder das unllas, o trabar dos dentes e unha barra espaciadora que só escribía silencios en liña. É abondo complicado poñer o fecho a un proxecto que, agora mesmo, lanzamos hai 10 meses. O 7 de xullo de 2020 abríase a porta deste forno de ideas, aínda que tres meses antes -e a lume maino, coas mans do país entregando esforzo- xa se estivera a quecer o fogar.  O día 9 faciamos un chamamento público a participar neste proxecto, no gustamos de recibir centos de colaboracións (hoxe suman 263) elaboradas por ducias e ducias de particulares (sociedade consciente, civil e activa), artistas plásticos e persoas do mundo da escrita. Polo que nese xullo, incluso antes de conmemorar o centario do nacemento de Isaac, saía a nosa primeira fornada, dende un blogue sinxelo, que ao longo de máis de corenta semanas espallou afectos, ideas fugantes e pezas marabillosas
Ler máis

Ana de Vilatuxe, Isaac e a tecelá de soños

Imaxe
Véxote... (peza de Ana de Vilatuxe) Das terras de Lalín vén a manda de hoxe, unha manda elaborada por unha das compoñentes do Alento Esbravexo, de aí que o que se poida dicir dela sempre vai saber a pouco. Chámase Ana Iglesias Otero, mais para todo o mundo é Ana de Vilatuxe: nas súas costas gusta de levar o estandarte das orixes e da palabra versificada en celeste. Véxote...   (peza de Ana de Vilatuxe) Ana é unha persoa arteira e artista, pois tanto lle dá á costura coma á creatividade téxtil, tanto lle dá á recompilación de expresións tipicamente galegas como a redactar textos marabillosos coma este que acompaña á súa obra. Digamos que entre outras afeccións está a de ser "coleccionista de palabras". Día tras día, e coma unha verdadeira Penélope, ía tecendo ideas para homenaxear a Isaac. Logo volvía destecelas e de novo ganduxaba outra. Creaba e derrubaba as súas pezas nunha catarse creativa, cíclica, en ziczac, como cando se pican as lapelas das chaquetas de bo xenero ou d
Ler máis