Manuel Seoane Trasande entrega unha para Isaac

Isaac Díaz Pardo (autor: Manuel Seoane Trasande)

Manuel Seoane Trasande é desa clase de arquitectos que ao tempo de deseñar, restaurar ou erguer vivendas gusta das artes plásticas e de valorar a todas aquelas persoas que foron quen de cicelar realidades artísticas, pintar estampas para fortalecer a nosa identidade, gravar imaxes co obxecto de rescatar as nosas orixes... Por iso Manuel Seoane compatibiliza o oficio coa ilustración, co deseño de imaxes que, sen dúbida, impactan e participan no rescate da memoria. Por iso Seoane non achega escusas nin pretextos para honrar a quen honrou a toda Galiza, dende a cerámica e dende a pintura, dende a cartelaría até a edición de ensaios, textos narrativos... E estamos a falar dun dos maiores xenios galegos dos tempos modernos: Isaac Díaz Pardo.

Pero deixemos que sexa o Manuel quen o indique. Ao tratar sobre súa obra-homenaxe a Isaac sinala que "a ilustración amosa o profundo amor de Isaac Díaz Pardo polas artes e a memoria da nosa terra. Xorden iconicamente imaxes relacionadas coas súas facetas como pintor, facetas literarias que terán o seu xerme nos encontros das 'Irmandades da fala' celebradas, na sua infancia, na casa do seu pai". Tamén engade o seu "importante papel como creador da Cerámica do Castro" e como "deseñador coa súa afamada cadeira antropomorfa". Alén diso, Díaz Pardo deixou "a súa pegada na historia galega coas cerámicas de Sargadelos". Para o arquitecto e artista foi un home "adiantado ao tempo que lle tocou vivir e que sempre loitou polo desenvolvemento da nosa  terra e as súas xentes". Ben haxa, Manuel Seoane... Beizóns!!