DE TAREIXA NAVAZA A ISAAC

Detalle do Santiago Matarratas
(deseño de Isaac Díaz Pardo)

Tareixa Navaza é unha recoñecida xonalista galega que exerceu a súa profesión en medios como a Cadena SER e TVE, amais de entregar os seus textos nunha manchea de cabeceiras, entre as que podemos citar as d'A Nosa Terra, Xornal de Galicia, La Voz de Galicia e El Correo Gallego... Moitas persoas recordámola por ter retransmitido a chegada a Galiza dos restos mortais do escritor de Sempre en Galiza, Afonso Daniel Rodríguez Castelao (1984). Desta volta quere agasallar a Isaac con esta fermosura de texto:

"Xuño 1987.

Entrega dos premios Santiago, creados por Manuel Lombao, Director de TVE - Galicia, na Capela Real do Hostal Dos Reis Católicos, para recoñecer o mellor deste País, o máis representativo. Vinteoito premiados. No apartado FACER GALICIA foron Isaac Díaz Pardo e Valentín Paz Andrade os distinguidos.

Isaac deseñou o trofeo a recibir, un marabilloso e vangardista  SANTIAGO MATARRATAS, lembrando a Luís Seoane e o seu poema “As ratas”:

“Na Galiza, ise vello pobo,
carballo carcomido de raios e bestigos,
loita, dende fai séculos,
o home cas ratas.”

Valentín, xa moi enfermo, empeorou días antes por unha caída no seu fogar. Morreu uns días máis tarde, sen poder recoller o que sería o seu último recoñecemento.

Unhas semanas despois desprazámonos a súa casa de Samil: Isaac, Lombao e máis eu para entregarlle o Santiago matarratas. Daquelas horas tan amenas lembro sempre unha cousa que dixo Pilar, A GRANDE ADMIRACIÓN QUE VALENTÍN  SENTÍA POR ISAAC, a quen definía coma UN XIGANTE COMPRIMIDO.

Volvendo atrás a cerimonia dos premios díxenlle a Isaac na presentación, entre outras cousas, que para min era como un home de película -no acto estaban presentes o director e os actores da película DIVINAS PALABRAS que se estaba a rodar en Galiza –, un home dese cine que nos fixo soñar e evadirnos nos tempos escuros, un home coma os protagonistas de Capra, que loitan pola colectividade, con honestidade e rectitude, un home como di o noso himno: bo e xeneroso. Sempre cheo de esperanza.

UN HOME, ISAAC,  QUE SOÑOU SEMPRE CON VENCER ÁS RATAS.

 

Tareixa Navaza González"

Santiago Matarratas (deseño de Isaac Díaz Pardo)