Pezas para a lembranza de Isaac elaboradas por Domingo Regueira

Detalle de Arte Pandémica (obra de Domingo Regueira)

Domingo Regueira publica hoxe a súa colaboración nesta espazo d'Unha manda de pezas para Isaac. Aínda que moitas persoas do Alento admiramos gran parte da súa obra, varios en particular somos fanáticos dos seus "Borranchos", pezas cargadas de movemento e personalidade. 

Arte Pandémica (obra
de Domingo Regueira)
Mais, como está a ser un costume nesta etapa do proxecto que estamos a desenvolver, cedémoslle a palabra e a letra a un verdadeiro embaixador da cultura do Barbanza, estámonos a referir a Manuel Cartea. Velaquí os atinados apuntamentos biográficos que entrega sobre Domingo Regueira.

"Domingo Regueira, natural de Palmeira. Estuda bacharelato e Arte na Escola de Artes Aplicadas da Coruña. Exerce como decorador e deseñador e, máis tarde, como profesor no colexio Hijas de Cristo Rey, de Oleiros. Logo, como autónomo, monta en Ribeira Esdudio20: rotulación, deseño gráfico, serigrafía etc.

Pero a pintura e o debuxo foron outras das súas dedicacións, con: óleo, acuarela, augada... Xa no 1978 presenta no Círculo Mercantil e Industrial de Ribeira unha selección de acuarelas e participa en varias exposicións colectivas no Barbanza e en Galicia, amén de traballos de ilustración (para textos de Antonio Novo, para o Suplemento Barbanza da Voz de Galicia...). 
Bocexo proba transfer celulósica
(obra de Domingo Regueira)

Dende hai tempo vénse dedicando a ilustrar temas históricos e mitolóxicos variados: os Irmandiños, Carlomagno, os celtas... e mesmo Valle-Inclán, un dos seus referentes literarios e morais.

A súa paixón pola arqueoloxía acompañouno toda a súa vida. Neste eido ten varias publicacións: Guía de petróglifos cruciformes, cruceiros e petos de ánimas (1986), unha guía de Ribeira, en 1986. Conta con importante e pioneira bibliografía sobre estudos e descubertas de moitas estacións arqueolóxicas do Barbanza, nos que aventura firmes hipóteses en “debuxos orientadores” sobre a construción destes monumentos megalíticos, sobradamente recoñecidos. Asidua foi a súa colaboración na sección PARA VER, da Voz de Galicia, polo que ser coñecido como “Artista oficial de Ribeira”. Amais, foi presidente da Confraría de Pescadores de Palmeira e concelleiro do Concello de Ribeira".

 (Manuel Cartea)

Proba transfer celulósica (obra de Domingo Regueira)

Catro son as pezas que presenta, todas cunhas mesas dimensións (42 por 32 centímetros, con marcos) e en técnicas inventadas polo propio Domingo Regueira. Os seus títulos son: Arte Pandémica, Bocexo proba transfer celulósica, Proba transfer celulósico e Colaxe dixital photoshop.

Colaxe dixital photoshop (obra de Domingo Regueira)


Comentarios

Publicar un comentario

Publicacións populares deste blog

Loli Suárez e un café con Isaac

Imaxe
Loli Suárez realizou esta instalación para lembrar as tonalidades da cerámica de Sargadelos, ese tons caligráficos da nosa epiderme cultural, sensíbel e con recendo a memoria que non esquece. Certo é que nela aparecen pezas desa fábrica, outrora rexida con ímpeto (pero sobre todo con xenerosidade) por Isaac Díaz Pardo. Porque esas alfaias azuis e brancas (abandeiradas no celeste) combinan moi ben co verde da Terra (da Nosa Terra!) dende a que se respira aínda hoxe a ánima imperecedoira daquel que veu ao mundo na Casa da Tumbona. Canda esta peza, un correo da súa autora advirte do seguinte: " Boa tarde! Achégovos a miña pequena homenaxe a Isaac Díaz Pardo. A foto é unha síntese do que el representa na miña vida e, sobre todo, dende que empecei a ler sobre el e Luís Seoane. Agradezo moito, moito esta inciativa. Unha aperta ben forte (...). María Dolores Suárez Baltasar ". Sinceramente, dende o Alento Esbravexo gustamos de instalacións tan xeitosas e acaídas como a que aquí se e
Ler máis

Ana de Vilatuxe, Isaac e a tecelá de soños

Imaxe
Véxote... (peza de Ana de Vilatuxe) Das terras de Lalín vén a manda de hoxe, unha manda elaborada por unha das compoñentes do Alento Esbravexo, de aí que o que se poida dicir dela sempre vai saber a pouco. Chámase Ana Iglesias Otero, mais para todo o mundo é Ana de Vilatuxe: nas súas costas gusta de levar o estandarte das orixes e da palabra versificada en celeste. Véxote...   (peza de Ana de Vilatuxe) Ana é unha persoa arteira e artista, pois tanto lle dá á costura coma á creatividade téxtil, tanto lle dá á recompilación de expresións tipicamente galegas como a redactar textos marabillosos coma este que acompaña á súa obra. Digamos que entre outras afeccións está a de ser "coleccionista de palabras". Día tras día, e coma unha verdadeira Penélope, ía tecendo ideas para homenaxear a Isaac. Logo volvía destecelas e de novo ganduxaba outra. Creaba e derrubaba as súas pezas nunha catarse creativa, cíclica, en ziczac, como cando se pican as lapelas das chaquetas de bo xenero ou d
Ler máis

Por ti, Isaac, volveriámolo facer!

Imaxe
Poñerse diante do teclado do ordenador para escribir algo que non queriamos facer, xusto hoxe, íase demorando instante tras instante, co morder das unllas, o trabar dos dentes e unha barra espaciadora que só escribía silencios en liña. É abondo complicado poñer o fecho a un proxecto que, agora mesmo, lanzamos hai 10 meses. O 7 de xullo de 2020 abríase a porta deste forno de ideas, aínda que tres meses antes -e a lume maino, coas mans do país entregando esforzo- xa se estivera a quecer o fogar.  O día 9 faciamos un chamamento público a participar neste proxecto, no gustamos de recibir centos de colaboracións (hoxe suman 263) elaboradas por ducias e ducias de particulares (sociedade consciente, civil e activa), artistas plásticos e persoas do mundo da escrita. Polo que nese xullo, incluso antes de conmemorar o centario do nacemento de Isaac, saía a nosa primeira fornada, dende un blogue sinxelo, que ao longo de máis de corenta semanas espallou afectos, ideas fugantes e pezas marabillosas
Ler máis