Mamen Bazarra, as mulleres absolutas e Isaac Díaz Pardo

Porque neste día de sol, onde choven reivindicacións a prol da igualdade (non só xurídica, non só social) da muller e do home, onde chove un diluvio de luz no que se proclama que "basta xa da violencia machista...", precisamos a voz unísona e unitaria de mulleres creadoras que reclamen o que dende anos levan facendo e que, tanta veces, non son visíbeis. 

Paraugas para Isaac
(obra de Mamen Bazarra)

Demandamos que non unicamente se tomben os roles sociais e estereotipos que tanto feren, senón que dunha vez por todas exista unha verdadeira igualdade salarial, efectivas oportunidades laborais -tantas veces traballando en precario!!- equilibrios e menos malabarismos mercantís e políticos, nunha palabra: XUSTIZA... 

As mulleres non somos tótem nin tabú, porque ademais de todo o que significamos -dende a igualdade e dende a diferenza- somos persoas. 

Paseamos polas rúas cos nosos paraugas abertos e vemos nomes que designan espazos unicamente dedicados ás persoas do outro xénero, todos homes ilustres, sen mulleres destacadas que fixeron e fan ciencia, arte, literatura, filosofía... Precisamos persoas -e non tanto xéneros-, precisamos mentes e para nada omisións e fraudes. Por iso debemos demandar unha verdadeira democratización da vida!

Por iso acae hoxe tan ben a manda que nos trae Mamen Bazarra Campos. Nela non só recorda a Isaac, pois reivindica o que é de xustiza para as mulleres -Mulleres Absolutas. A súa obra, ademais do uso para o que está destinado, serve para alzar a voz e demandar que basta xa de desigualdades: "as mulleres existimos!!". 

Con respecto ao mestre de Sargadelos, Mámen sinala o seguinte:

"Coñezo a súa obra desde moi pequena... O meu tío Chichi Campos (debuxante, guionista e escritor) estaba moi relacionado con Isaac a nivel laboral e tamén coa súa contorna máis inmediata. Así que tiven a sorte de coincidir con el nalgunhas ocasións. Para min, Isaac Díaz Pardo é terra, é sentir, e forza e país. A súa arte, en calquera manifestación, conéctame con Sargadelos, arte fresca e determinada... as súas facianas... e miradas... e proporcións... fascínanme. Nesta obra centreime na súa visión da Muller, como Nai, como Forza de Traballo e Raíz. E que mellor soporte que un paraugas nesta terra de auga".

Mulleres absolutas - Un paraugas para Isaac (obra de Mamen Bazarra Campos)

Beizóns e que comecen a chover leis, normas e protocolos efectivos que consigan que as mulleres teñamos o que nos corresponde dende sempre!