José Manuel Méndez e un óleo para Díaz Pardo

Librería Díaz Pardo (óleo de José Manuel Méndez)

Que marabillas chegan para honrar a Isaac! Nalgunhas aínda recende a pintura fresca. Case se poderían respirar todas e cada unha das tonalidades, as fragrancias dunha historia coma a que nos trae José Manuel Méndez. O autor leva unha longa traxectoria vinculada ás artes plásticas e formou parte dos colectivos FOGA e PATAKA. Ardua tarefa sería a enumeración de todas as mostras individuais así como as colectivas nas que ten participado. Está totalmente recoñecido o seu traballo sobre pasaxes mitolóxicas gregas con retratos de xente das artes plásticas e escénicas. 

En 2006 recibe a encarga de elaborar unha serie de murais retro iluminados para a exposición "Contos Dixitais" no C.G.A.C. Alén disto, ocupa a dirección artística da empresa Escenoset que realiza proxectos para a televisión, a ópera, o teatro, stands, museos, e exposicións. 

Este cadro que nos achega José Manuel Méndez forma parte dunha serie de "trampantojos" titulada Librerías, e esta, a que vos amosamos, é a libraría Díaz Pardo. A obra, de 70 por 48 centímentros de longo e alto, respectivamente, elaborouse en óleo sobre pet... Polo que xa veredes que ben respira a paisaxe biográfica de Isaac Díaz Pardo! Que ben recende dende a precisión técnica ao contido simbólico! Dende os clarescuros até a calidez dos vermellos que perfilan algúns libros (recordatorios vitais dunha existencia entregada á valorización da cultura galega)! 

Beizóns ao artista, José Manuel Méndez... Mil parabéns e que sigan correndo regueiros de cor!

Librería Díaz Pardo (óleo de José Manuel Méndez)


Comentarios

Publicar un comentario

Publicacións populares deste blog

Ana de Vilatuxe, Isaac e a tecelá de soños

Por ti, Isaac, volveriámolo facer!

Araceli Guillán, Isaac Díaz Pardo, as ilustracións e os meigallos