De Ángel Utrera a Isaac Díaz Pardo

Dende as terras de Agolada vén unha manda a xeito de colaxes deseñados por Ángel Utrera Baza. En ambas obras mestúrase a cor e o branco e negro, e con elas intenta facer o autor unha retrospectiva vital de Isaac Díaz Pardo.

Comenta Ángel, cun galego correctísimo malia non ser natural do noso país, que a primeira das obras "trata de pór en valor a obra pictórica fundamentalmente de Diaz Pardo, a través da xente do pobo, labregos que el plasmou nos seus lenzos, dun xeito visceral e duro, coma a mesma terra".

No que atinxe á segunda das pezas sinala: "pretendo máis ben deixar plasmada a ollada do `propio Díaz Pardo a través das fotos: algunhas da súa vida, en escenas cotiás de familia, traballo e amigos". Dito noutras verbas "o lado mais persoal e humano do artista".

O autor das composicións -como bo artista que é, defensor e divulgador do patrimonio galego amais de recoñecido fotógrafo- advirte que "as fotos son públicas, non da miña propiedade, están e circulan libremente por internet como expoñente da súa obra e personalidade, e eu unicamente elixín as que me impactan dun xeito mais expresivo".

Beizóns, artista!