UNHA MANDA PARA ISAAC CHEGADA DENDE OS ANTÍPODAS POR EKATERINA VOLKOVA

A Galicia que Isaac leva na cabeza
(Autora: Ekaterina Volkova)
Hoxe presentamos unha peza que nos enviaron dende os antípodas galegas, isto é dende Nova Zelandia. Esta alfaia foi realizada por Ekaterina Volkova, unha investigadora rusa que traballa na Universidade de Auckland e que, de cando en cando, se achega a Compostela para se enchoupar da cultura galega (tanto a nivel histórico como actual). Leva varios anos estudando a plástica galega en concreto e a cultura galega en xeral, facendo pequenas mostras e presentacións monográficas sobre pintura, literatura, cartelismo,... Arestora anda a traballar nun proxecto ao que lle deu en chamar "(Re)imaxinando a galeguidade. A cultura visual e a identidade nacional en Galicia".
A peza que lle dedica a Isaac Díaz Pardo e que incluímos en Unha manda de pezas para Isaac titúlase A Galicia que Isaac leva consigo. Cando lle preguntamos en que se inspirou para facer este cadro, díxonos: 
"Para a realización deste traballo, inspireime na imaxe recorrente na obra de Isaac; isto é unha muller cos ollos grandes que leva as cousas sobre a súa cabeza [refírese á rapaza que leva na cabeza un mundo de cousas que pode precisar na vida]. O telón de fondo é, por suposto, o mapa de Galiza, ao que lle engadín un dos motivos máis coñecidos de Sargadelos, o proxecto de toda a vida de Isaac".

Para a súa realización botou man do papel, da colaxe, do acrílico e montando todo sobre unha táboa de poliuretano de tamaño A1 (841 x 594 mm)

Comentarios

  1. "A rapaza que leva na cabeza un mundo de cousas" pode cargar un prato, a idea de Isaac e a representación de Galicia. Ela, que transporta trebellos, tamén pode levar os soños compartidos.
    Grazas, Ekaterina, por mostrarnos esta outra perspectiva.

    ResponderEliminar

Publicar un comentario

Publicacións populares deste blog

Ana de Vilatuxe, Isaac e a tecelá de soños

Por ti, Isaac, volveriámolo facer!

Araceli Guillán, Isaac Díaz Pardo, as ilustracións e os meigallos