DE XAQUÍN MARÍN A ISAAC DÍAZ PARDO

Home Pequeno - Obra Colosal
(autor: Xaquín Marín)

Ninguén pode discutir que Xaquín Marín é unha das figuras máis relevantes do mundo da ilustración galega. As súas tiras cómicas teñen saído en páxinas de varios xornais do noso país, mais a súa obra sempre se tingue de retranca e crítica, sobre todo no que afecta a temas sociais e lingüísticos. Porque para el o idioma é un motivo constante de defensa e un compromiso vital, do mesmo xeito que o son figuras básicas da historia galega, sirva de exemplo Isaac Díaz Pardo. O artista de Ferrol, que ten participado en numerosas feiras internacionais da caricatura, elaborou varias estampas vinculadas a Isaac Díaz (ferrolán tamén de orixe aínda que nado en Compostela).

N'A Nosa Terra, El Ideal Gallego, La Voz de Galicia, Teima, Diario 16, Le Telegramme... apareceron as súas ilustracións, ademais de ser autor de varios libros (algúns dos cales gardamos comos se fosen tesouros da infancia). Houbo quen gustou de distinguilo co premio "Bo e Xeneroso" (referímonos á AELG), e ben concordamos con isto pois un rasgo que define a Xaquín é a súa bohonomía... 

Velaquí vos entregamos a ilustración que, para Alento Esbravexo, elaborou co obxecto de conmemorar o centenario do nacemento de Isaac Díaz Pardo, porén tamén traemos outras ilustracións elaboradas polo artista para recordar a tan egrexio empresario defensor, outrosí, do galeguismo e que el define como "un home pequeno de obra colosal".

Viñeta sacada por Xaquín Marín canda o pasamento
de Isaac Díaz Pardo