De Elixio Vieites a Isaac Díaz Pardo

Elixio Vieites, alén de ser un gran coñecedor, percorredor de mundos vinculados coa historia e a arqueoloxía, activista cultural e catalogador do noso patrimonio nacional, é técnico no Centro Dramático Galego. Moitas persoas témolo coñecido mercé dos seus artigos publicados en historiadegalicia.gal ou de formar parte dese fantástico patrimoniogalego.net, pois deste último é un dos seus membros e editores. Neste sitio vai engadindo centos de lugares vinculados coa Nosa Terra (identidade, historia e arqueoloxía), como un catálogo xeral de todo o que nos é propio dende a cultura material. Pero para el, dentro do patrimonio de todas e todos os galegos, tamén ocupa un  espazo principal o egrexio Isaac Díaz Pardo.

Elixio, na súa memoria, tráenos unha fotografía tremendamente simbólica e chea de información, malia seguir unha corrente minimalista na forma que, para nada, o é dende os contidos: resulta unha explosión informativa tras a simplicidade visual (ás veces tan complicada de acadar). Comenta o seguinte ao respecto:

"Facer que a arxila da terra se converta en cultura, identidade e riqueza.. Se cada un de nós collese un anaco de país e o transformase aportaría o seu gran de area ,e nunca mellor dito. De calquera materia pode xurdir o sublime".

Tamén engade:

"A foto foi sacada en posición cenital enriba da herba con Cámara Canon Eos 100. Vemos unha peza de Sargadelos, que está sempre con nós e adoita ter flores, Ao seu lado unha pedra granítica de cor branca que representaría a materia sen traballar. O contraste entre o primixenio telúrico e o elaborado culturalmente".

A teor disto, sobra calquera comentario.