UNHA MANDA DE ALOIA E MAMI PARA ISAAC

Man, manciña, tan, tan de Aloia e Mami

A peza de hoxe titúlase  Man, manciña, tan, tan e fáinola chegar un colectivo que se dá en chamar Aloia e Mami; isto é: unha nena chamada Aloia, de 3 anos, e a súa nai Tareixa Martínez (máis coñecida nas redes como Tareixa Cereixa). Unha "peza" feita con pintura téxtil, plastilina e rotuladores sobre papel e na que usaron, ademais de pinceis, as propias mans. O importante para a súa elaboración, con independencia de realizalo con moito cariño e sentimento, é a intención de vencellar a Isaac coa lingua de signos. 

Animámosvos, pois, a descubrir que din esas mans que están debuxadas.

Coméntanos Tareixa:

Para min Isaac é Sargadelos, e Sargadelos é Isaac, e medrei nunha casa chea de cousas de Sargadelos: a casa da miña avoa materna.

Miña avoa Teresa tiña unha chea de animaliños de Sargadelos no salón e a vaixela que inda agora, máis de 10 anos despois de que falecese, seguimos a usar para as festas. Na parede da entrada da súa casa aínda están pendurados un bó numero dos fetiches e amuletos tamaño XL que ten Sargadelos: o furamán, o cornamán, a figa, o trampallán, o curuxán etc.

Gardo moi bo recordo desas pezas porque van asociadas a todos os bos momentos que vivín nesa casa.

Aloia pintando a pincel
unha das mans

A miña filla, ao igual ca moitas crianzas, está fascinada coa posibilidade de debuxar mans empregando a súa propia ou a doutra persoa como plantilla e repasándoa cun lapis. Foi facendo isto precisamente, debuxando as nosas mans, como veu á miña mente a idea de recrear o furamán e o cornamán da casa da miña avoa.

Certo é que cunha nena tan pequena non podiamos facer algo moito máis elaborado, pero ela implicouse moito e, agás o de repasar co rotulador, fixo todos os outros pasos. 

Gozamos xuntas dun tempo moi bo creando a nosa contribución a esta homenaxe a Isaac.

Ah! O título da obra e o nome da nosa equipa tamén foron invención da pequena.

Un intre e unha creación chea de cariño e ilusión