A ASOCIACIÓN GALEGA DE EDITORAS E A SÚA MANDA A ISAAC

Nesta iniciativa d'Unha manda de pezas para Isaac tamén participa a Asociación Galega de Editoras. Achéganos un texto onde podemos (re)descubrir a faceta de Isaac como editor.

ISAAC EDITOR

O 16 de decembro de 2006, durante a segunda Noite da Edición da Asociación Galega de Editoras, celebrada no Liceo Casino de Pontevedra, o noso gremio nomeaba a Isaac Díaz Pardo Presidente de Honra desta Asociación. (Naquel acto tamén se recoñecía a Sabino Torres cun Premio á Edición Histórica).

Dende ese 2006 Isaac pasaba a ser o primeiro, e único ata hoxe, presidente de Honra da Asociación Galega de Editoras, o colectivo que, creado en 1982, integra hoxe corenta selos editoriais e o 90% da produción editorial do país.

A dimensión como editor de Isaac Díaz Pardo é fundamental para entender a reconstrución cultural que viviría Galicia, directamente dende a Transición, pero xa moitos anos antes, en plena ditadura, dende comezos dos anos sesenta.

Por una banda, el representa, na súa propia figura e na de seu pai Camilo Díaz Baliño, esa conexión directa coa xeración republicana dos anos trinta, onde xurdira o primeiro proxecto editorial moderno do país, Edicións Lar de Leandro Carré a Ánxel Casal, logo rebautizada como Editorial Nós, xa en Compostela e con Casal á fronte.

Moito tempo e sufrimentos despois, á altura de 1963, Díaz Pardo poñía en marcha Ediciós do Castro, ao abeiro do complexo industrial e cultural de Sargadelos, un selo fundamental para entender a nosa memoria histórica, a guerra civil, o exilio e a emigración. Unha empresa cultural que foi tamén quen de publicar a novela en galego máis lida e traducida do século XX, as inesquecibles Memorias dun neno labrego de Xosé Neira Vilas.

A figura como editor de Isaac Díaz Pardo representa pois o mellor deste oficio: unha persoa e un proxecto cultural honestos, firme nas súas conviccións, aberto, que foi dando á luz algúns dos mellores e máis valentes testemuños vitais da nosa historia recente e con eles contribuíu decididamente a crear unha sociedade máis capacitada, máis libre e con esa teima firme de loita por un futuro mellor.

Por todo isto, Isaac Díaz Pardo é todo un referente para as persoas que integramos a Asociación Galega de Editoras e en concreto para esta Xunta Directiva. No centenario do seu nacemento, e oito anos despois do seu pasamento, Isaac segue a ser o único e sempre lembrado Presidente de Honra deste colectivo.

Xunta Directiva

Asociación Galega de Editoras

Agosto de 2020