Aves limícolas, Isaac e Susana Bermejo

Composición antropomórfica con aves limícolas

Gravados, esculturas, pinturas, debuxos, poemas, cartas, textos ensaísticos... e agora tamén un colaxe dixital para honrar a Isaac. Está confeccionado por Susana Bermejo nun soporte de tamaño A3 e gustou de titulalo Composición antropomórfica con aves limícolas. A autora comenta o seguinte en relación á súa peza: 

Composición antropomórfica
con aves limícolas (colaxe dixital
de Susana Bermejo)

"Esta obra é unha homenaxe a Isaac. A cadeira antropomórica, deseño do artista en 1976, feita en madeira de castiñeiro e ferro formaba parte do mobiliario das galerías Sargadelos conformando unha edición limitada. Esta, aínda estando baleira, evoca unha presenza que as aves arroupa e á que seguen insuflando vida. Unha vida que repousa prácida sobre os seus alicerces. Unhas aves de recente creación que encarnan a pervivencia do traballo que un día emprendeu Isaac. Dunha empresa que segue a explorar novas liñas orgullosa de expandir a súa marca máis aló das nosas fronteiras".

Fermosas e optimistas palabras son as entregadas por Susana, dende a xenerosidade e a sinceridade,... mais oxalá se siga a estender o que significa Galiza máis aló das nosas fronteiras do xeito que o fixeron Isaac e Seoane, do xeito que o fixeron e fan artistas que teñen os pés na terra (na Nosa Terra) e as ás estendidas por todo o mundo co fin de arroupalo. 

Susana Bermejo achega con esta súa manda un bo testemuño da súa arte, do seu bo facer e o seu bo querer, pois esta deseñadora e artista ferrolá foi pendurando numerosas obras súas en diversos espazo ao longo da xeografía galega. Velaí as súas mostras na Galería Atlántica Centro de Arte (A Coruña), a Fundación Abanca (Vigo), o Centro Cultural Torrente Ballester (Ferrol) e as galerías Sargadelos de diversas localidades (Compostela, A Coruña, Ferrol...).

Mil grazas, Susana, por esta obra, polo teu recordo permanente da figura de Isaac e por gustar dun mundo ateigado de poesía pictórica.